"Umhle Kangaka Khe Warhuba" by Ondela Wanda Zweni

Indixhwitha indixhole indixhaxha

indikruna indipetya okungathi ndingubhontsi

indixananazisa andisakwazi nokuxoka

andixhelanga xhukwane

esi isikhohlela andikwazi nokusibika kubani...

Ndisiginya ndodwa gaga-gaga  gaga-gaga

sisihla ngomqala apho siyakhona siyokuthunuka intliziyo sibethe ihlaba endingakwazi nokulichaza

pilisi ntoni asilochiza..

bandithwetyule ngokundinyemba bendinyenyisa,

ewe banditicele besithi ndiyeyengxwangxwa inja ndisisizalo somhadi/

batshilo batshilo besithi kakade ndingumgqakhwe bekufanele

ndifanele ubalilo ilolo elinempondo kodwa lingenanjongo

ndingubanina kakade mna kodwa ndithi “umhle kangaka na wakhe warhuba”

Ndiziphulaphule ndiphuma ezegazi

ndithwetyulwa zinkumbulo

noko esi isihlophoyiya siyandisinda

ndikrazuka ndigrogola ndigodola kungekhobani

ilizwi lirhwexa kukukhwaza okosana embelekweni, Yho! Yho! Yho!

ndirhaxwa ndigwintwa uqhoqhoqho

esosikhalo akukho iginyis 'amathe,

bendithi ndiyafula ndigawula kanti igaba lichana emnweni

Kuthula kuzola ufumanekaphi na ndingene ndizinqengqe ndizigquma kula mabakala eli magada hlabayo....

Kuhleka okuyinene, lonwabo olunoxolo ndingakuthathaphi na ndikuxhwile ungene uhlale uhluma

hleze kuthi kanti singamaphuth'ahlathilinye....

Kodwa andizozixhwith'intamo ndizicikide ndizingcatshe ndizigwinte ndizigece

hayi ndiyapheza ukuzigeca ndizindlakazelisa ngengcinga

ewe ndiyayiqonda okokuba iyandikurhaxa le rhasi urhona akuyeki

isezakuphuphumala neyam ibhekile ndiwelwe ngumqa esandleni

kusezakubayinyambalala

ndithi gcobho ebhotolweni ndihlinze amanqatha

noxa ngoku ndiphantsi kwamanqwanqwa

Ubuchule kukuncekelela

ndigidele noba yincidi sekukufuphi ndityibilike kwisibindi

NdizakuHlala ndimi hleze kuthi kanti amaflityo-flityo akude kufuphi namaqabaza emvula sele qala ukuchaphaza..

(Ondela Zweni wrote this piece for the play "Umhle Kangaka Khe Warhuba?", the title of the play was taken from this piece).